ರಾಜ್ಯ ಕಂಡ ಬೆಳಕಿನ ವಿಸ್ಮಯಕ್ಕೆ ಕಾರಣ 'ಎಲೋನ್‌ ಮಸ್ಕ್'!..ನೀವು ತಿಳಿಯದ ಮಾಹಿತಿ!

Bhaskar N J | Vijaya Karnataka Web | Updated: Dec 21, 2021, 9:24 AM

ಸ್ಯಾಟ್‌ಲೈಟ್ ಇಂಟರ್ನೆಟ್ ಒದಗಿಸುವುದಕ್ಕಾಗಿ ಸ್ಪೇಸ್ ಎಕ್ಸ್ (SpaceX) ನೆನ್ನೆ ಕ್ಯಾಲಿಫೋರ್ನಿಯಾ ಹತ್ತಿರದ ಉಡಾವಣೆ ಕೇಂದ್ರದಿಂದ 52 ಸ್ಟಾರ್‌ಲಿಂಕ್ (Starlink) ಸ್ಯಾಟ್‌ಲೈಟ್‌ಗಳನ್ನು ಯಶಸ್ವಿಯಾಗಿ ಉಡಾವಣೆ ಮಾಡಿದೆ. ಸ್ಟಾರ್‌ ಲಿಂಕ್‌ ಎಂಬ ಯೋಜನೆಯಡಿ ಈಗಾಗಲೆ 1,800ಕ್ಕೂ ಹೆಚ್ಚು ಉಪಗ್ರಹಗಳನ್ನು ಉಡಾವಣೆ ಮಾಡಲಾಗಿದೆ. ಅವುಗಳಲ್ಲಿ 1,732 ಉಪಗ್ರಹಗಳು ತಮ್ಮ ನಿಗದಿತ ಕಕ್ಷೆಯಲ್ಲಿ ಭೂಮಿಯನ್ನು ಸುತ್ತುತ್ತಿವೆ.

ರಾಜ್ಯದಲ್ಲಿ ನೆನ್ನೆ ಸಂಜೆ 7ರಿಂದ 8 ಗಂಟೆ ಅವಧಿಯಲ್ಲಿ ಆಗಸದಲ್ಲಿ ಸಕ್ಷತ್ರಗಳು ಚಲಿಸುವಂತಹ ಬೆಳಕಿನ ಸರಮಾಲೆ ಕಂಡು ಬಂದು ಬೆರಗು ಮೂಡಿಸಿದ ವಿಷಯ ಬಹುತೇಕ ಎಲ್ಲರಿಗೂ ತಿಳಿದಿದೆ ಎನ್ನಬಹುದು. ನಕ್ಷತ್ರಗಳು ಒಂದು ರೇಖೆಯಲ್ಲಿ ಚಲಿಸುತ್ತಿರುವಂತೆ ಕಂಡು ಬಂದ ವಿಸ್ಮಯಕ್ಕೆ ಎಲ್ಲರೂ ಒಮ್ಮೆ ಮೂಕವಿಸ್ಮಿತರಾಗಿದ್ದರು. ಆದರೆ, ಇದಕ್ಕೆ ನಿಖರ ಕಾರಣ ಏನು ಎಂಬುದು ತಿಳಿದುಬಂದಿದೆ. ಸ್ಯಾಟ್‌ಲೈಟ್‌ಗಳ ಮೂಲಕ ಜಗತ್ತಿನ ಎಲ್ಲ ಕಡೆಯೂ ಇಂಟರ್ನೆಟ್‌ (Internet) ಸೇವೆಯನ್ನು ಒದಗಿಸುವ ಗುರಿಯನ್ನು ಹಾಕಿಕೊಂಡಿರುವ ಎಲಾನ್ ಮಸ್ಕ್ (Elon Musk) ಒಡೆತನದ ಸ್ಪೇಸ್ ಎಕ್ಸ್ (SpaceX) ಸಂಸ್ಥೆಯು ಉಡಾವಣೆ ಮಾಡಿರುವ ಸರಣಿ ಉಪಗ್ರಹಗಳ ಸರಮಾಲೆ ಇದಾಗಿದ್ದು, ಉಪಗ್ರಹಗಳು ಸಾಮಾನ್ಯ ಜನರಿಗೂ ಬರಿಗಣ್ಣಿಗೆ ಕಾಣಿಸುವಂತೆ ಕಕ್ಷೆಯನ್ನು ಸೇರಿವೆ.!

ಸ್ಯಾಟ್‌ಲೈಟ್ ಇಂಟರ್ನೆಟ್ ಒದಗಿಸುವುದಕ್ಕಾಗಿ ಸ್ಪೇಸ್ ಎಕ್ಸ್ (SpaceX) ನೆನ್ನೆ ಕ್ಯಾಲಿಫೋರ್ನಿಯಾ ಹತ್ತಿರದ ಉಡಾವಣೆ ಕೇಂದ್ರದಿಂದ 52 ಸ್ಟಾರ್‌ಲಿಂಕ್ (Starlink) ಸ್ಯಾಟ್‌ಲೈಟ್‌ಗಳನ್ನು ಯಶಸ್ವಿಯಾಗಿ ಉಡಾವಣೆ ಮಾಡಿದೆ. ಸ್ಟಾರ್‌ ಲಿಂಕ್‌ ಎಂಬ ಯೋಜನೆಯಡಿ ಈಗಾಗಲೆ 1,800ಕ್ಕೂ ಹೆಚ್ಚು ಉಪಗ್ರಹಗಳನ್ನು ಉಡಾವಣೆ ಮಾಡಲಾಗಿದೆ. ಅವುಗಳಲ್ಲಿ 1,732 ಉಪಗ್ರಹಗಳು ತಮ್ಮ ನಿಗದಿತ ಕಕ್ಷೆಯಲ್ಲಿ ಭೂಮಿಯನ್ನು ಸುತ್ತುತ್ತಿವೆ. 2018ರ ಫೆ. 22ರಂದು ಆರಂಭವಾದ ಈ ಯೋಜನೆಯಲ್ಲಿ ವಿವಿಧ ಹಂತಗಳಲ್ಲಿ ಉಪಗ್ರಹಗಳನ್ನು ಉಡಾವಣೆ ಮಾಡಲಾಗುತ್ತಿದೆ. ಅವುಗಳಲ್ಲಿ ನೆನ್ನೆ ಒಂದು ಗುಂಪಿನ ಉಪಗ್ರಹಗಳು ಆಗಸದಲ್ಲಿ ಕಂಡುಬಂದಿವೆ. ಈ ಎಲ್ಲ ಸ್ಯಾಟ್‌ಲೈಟ್‌ಗಳನ್ನು ಸುರಕ್ಷಿತವಾಗಿ ಅವುಗಳ ಕಕ್ಷೆಯಲ್ಲಿ ಇರಿಸಲು ಸ್ಪೇಸ್‌ಎಕ್ಸ್ (SpaceX) ಯಶಸ್ವಿಯಾಗಿದೆ.

ಇನ್ನು ಆ ಉಪಗ್ರಹಗಳು ಬರಿಗಣ್ಣಿಗೆ ಕಾಣಿಸಲು ಕಾರಣವೇನು ಎಂಬುದು ಸಹ ತಿಳಿದುಬಂದಿದೆ. ಸ್ಪೇಸ್ ಎಕ್ಸ್ (SpaceX) ಸಂಸ್ಥೆಯು ಉಡಾವಣೆ ಮಾಡಿರುವ ಉಪಗ್ರಹಗಳು ಭೂಮಿಗೆ ಹತ್ತಿರದ ಕಕ್ಷೆಗೆ ಸೇರಲಿವೆ. ಹಾಗೂ ಕತ್ತಲೆಯಲ್ಲಿ ಈ ಉಪಗ್ರಹಗಳ ಹೊರಮೈ ಸೂರ್ಯನ ಬೆಳಕನ್ನು ಪ್ರತಿಫಲಿಸುತ್ತಾ ಸಾಗುತ್ತವೆ. ಇದರಿಂದ ಸಮಾನಾಂತರವಾಗಿ ಸರಳರೇಖೆಯಲ್ಲಿ ಚಲಿಸುವಾಗ ನಕ್ಷತ್ರಗಳು ಚಲಿಸಿದಂತೆ ಕಾಣಿಸುತ್ತವೆ. ಈ ವಿದ್ಯಮಾನ ಹೊಸದೇನಲ್ಲ. ಕಳೆದ ಕೆಲ ದಿನಗಳಿಂದ ವಿಶ್ವದ, ದೇಶದ ಕೆಲ ಭಾಗಗಳಲ್ಲಿ ಇದು ಸುದ್ದಿಯಾಗುತ್ತಲೇ ಇದೆ. ಆದರೆ ರಾಜ್ಯದ ಕರಾವಳಿಯಲ್ಲಿ ಮಾತ್ರ ಸೋಮವಾರ ಸ್ಪಷ್ಟವಾಗಿ ಗೋಚರಿಸಿದೆ. ಹಲವೆಡೆಯಿಂದ ತಮಗೆ ಕರೆಗಳು ಬಂದಿವೆ ಎಂದು ಹವ್ಯಾಸಿ ಖಗೋಳ ವಿಕ್ಷಕರ ಕ್ಲಬ್‌ನ ಅತುಲ‌ ಭಟ್‌ ಅವರು ತಿಳಿಸಿದ್ದಾರೆ.

ಈ ಮೊದಲೇ ಹೇಳಿದಂತೆ ಸ್ಟಾರ್‌ಲಿಂಕ್ ಸಂಸ್ಥೆಯು ಸ್ಯಾಟ್‌ಲೈಟ್ ಆಧರಿತ ಜಾಗತಿಕವಾಗಿ ಇಂಟರ್ನೆಟ್ ವ್ಯವಸ್ಥೆಯನ್ನು ತರುವ ಯೋಜನೆಯನ್ನು ಹಾಕಿಕೊಂಡಿದೆ. ಹಲವು ವರ್ಷಗಳಿಂದ ಈ ದಿಶೆಯಲ್ಲಿ ಕೆಲಸ ಮಾಡುತ್ತಿರುವ ಸ್ಪೇಸ್ ಎಕ್ಸ್ ಜಗತ್ತಿನ ಇಂಟರ್ನೆಟ್ ರಹಿತ ಪ್ರದೇಶಗಳಿಗೂ ಇಂಟರ್ನೆಟ್ ಸೌಲಭ್ಯ ಕಲ್ಪಿಸಲು ಮುಂದಾಗುತ್ತಿದೆ. ಶನಿವಾರದ ಮಿಷನ್, ಸ್ಟಾರ್‌ಲಿಂಕ್ನ 34ನೇ ಉಡಾವಣೆಯಾಗಿದೆ. ಭೂಮಿಯ ಕೆಳ ಹಂತದ ಕಕ್ಷೆಗೆ ಒಟ್ಟು 2000 ಸ್ಯಾಟ್‌ಲೈಟ್‌ಗಳನ್ನು ಸೇರಿಸುವ ಗುರಿಯನ್ನು ಸ್ಟಾರ್‌ಲಿಂಕ್ ಹಾಕಿಗೊಂಡಿದೆ. ಒಟ್ಟಾರೆ ಭವಿಷ್ಯದಲ್ಲಿ ಉಪಗ್ರಹಗಳ ಸಂಖ್ಯೆ 42 ಸಾವಿರ ದಾಟುವ ಸಾಧ್ಯತೆಯೂ ಇದೆ.ಈ ಉಪಗ್ರಹಗಳು ಭೂಮಿಯ ಸುತ್ತ ತಿರುಗುತ್ತಾ ವಿಶ್ವದ ಪ್ರತಿ ಮನೆಗೂ ವಯರ್‌ಲೆಸ್‌ ಇಂಟರ್‌ನೆಟ್‌(Internet) ಸೇವೆಯನ್ನು ನೀಡಲಿವೆ.

Read more >> © VIJAYAKARNATAKA